Bapatla : పౌర హక్కుల పరిరక్షణ ప్రతి ఒక్కరి బాధ్యత – తహసీల్దార్ షేక్ సలీమా
బాపట్ల జిల్లా : బాపట్ల : స్వచ్ఛవార్త :
మండలంలోని బేతపూడి గ్రామంలో మండల తహసీల్దార్ ఎస్.కె. సలీమా అధ్యక్షతన పౌర హక్కుల దినోత్సవ కార్యక్రమం ఘనంగా నిర్వహించారు. ఈ కార్యక్రమంలో మండల స్థాయి వివిధ శాఖల అధికారులు, సిబ్బంది, గ్రామస్థులు పాల్గొన్నారు.
ఈ సందర్భంగా తహసీల్దార్ ఎస్.కె. సలీమా మాట్లాడుతూ...
భారత రాజ్యాంగం ప్రతి పౌరుడికి సమాన హక్కులు కల్పించిందని, కులం, మతం, వర్ణం, లింగ భేదాలకు అతీతంగా ప్రతి ఒక్కరికీ సమాన అవకాశాలు, గౌరవం లభించేలా రాజ్యాంగం హామీ ఇస్తుందని తెలిపారు. పౌరులు తమ హక్కులను తెలుసుకుని వాటిని సద్వినియోగం చేసుకోవడంతో పాటు రాజ్యాంగం కల్పించిన విధులను కూడా బాధ్యతాయుతంగా నిర్వర్తించాలని సూచించారు. ప్రభుత్వ సంక్షేమ పథకాలు అర్హులైన ప్రతి లబ్ధిదారునికి పారదర్శకంగా, వివక్ష లేకుండా అందేలా అన్ని శాఖల అధికారులు సమన్వయంతో పనిచేయాలని ఆమె పిలుపునిచ్చారు.
సమాజంలో సామరస్యం, సమానత్వం, సామాజిక న్యాయం నెలకొల్పడంలో ప్రతి ఒక్కరూ భాగస్వాములు కావాలని కోరారు. పౌర హక్కుల పరిరక్షణ, ప్రజలకు మెరుగైన సేవలందించడంలో మండల స్థాయి అధికారులు సమిష్టిగా కృషి చేస్తున్నారని ఆమె అభినందించారు. కార్యక్రమాన్ని విజయవంతంగా నిర్వహించిన అధికారులు, సిబ్బంది, గ్రామ పెద్దలు, ప్రజాప్రతినిధులు మరియు గ్రామస్థుల సహకారాన్ని తహసీల్దార్ ప్రత్యేకంగా ప్రశంసించారు.
కార్యక్రమంలో మండల స్థాయి వివిధ శాఖల అధికారులు, సిబ్బంది, గ్రామ పెద్దలు, ప్రజాప్రతినిధులు, స్వయం సహాయక సంఘాల సభ్యులు మరియు గ్రామస్థులు పాల్గొన్నారు.ఎంఇఓ నిరంజన్, ఎంపీడీవో బాబూరావు, డిప్యూటీ ఎంపీడీవో పల్నాటి శ్రీరాములు, సాంఘిక సంక్షేమ శాఖ డిడి సత్యనారాయణ తదితరులు పాల్గొన్నారు.
