Vijayawada/Vizag : ప్రభుత్వ సంక్షేమ పథకాలను ప్రజల్లోకి తీసుకెళ్లడంలో పత్రికారంగం పాత్ర కీలకం : మంత్రి సత్యకుమార్

 

విజయవాడ/విశాఖపట్నం : పత్రికా సమాచార కార్యాలయం(PIB) : స్వచ్ఛవార్త :

ఆంధ్రప్రదేశ్ రాష్ట్ర ఆరోగ్య, కుటుంబ సంక్షేమ మరియు వైద్య విద్య శాఖ మంత్రి సత్యకుమార్ యాదవ్ ఈరోజు విశాఖపట్నంలో పత్రికా సమాచార కార్యాలయం (పిఐబి) విజయవాడ ప్రాంతీయ కార్యాలయం, సమాచార మరియు ప్రసార మంత్రిత్వ శాఖ, భారత ప్రభుత్వం ఆధ్వర్యంలో జిల్లా మరియు గ్రామీణ విలేకరుల కోసం ఏర్పాటు చేసిన ఒక రోజు మీడియా వర్క్‌షాప్ "వార్తాలాప్" ను ప్రారంభించారు.  

వర్క్ షాప్ ను ప్రారంభిస్తున్న మంత్రి సత్య కుమార్

ప్రధానమంత్రి నరేంద్ర మోదీ నాయకత్వంలో సంక్షేమం, అభివృద్ధి మరియు సుపరిపాలనతో కూడిన 12 ఏళ్ల పాలనను పురస్కరించుకుని దేశవ్యాప్తంగా నిర్వహిస్తున్న ప్రచార కార్యక్రమాలలో భాగంగా ఈ వర్క్‌షాప్‌ను నిర్వహించారు. జిల్లా నలుమూలల నుంచి విలేకరులు ఈ కార్యక్రమంలో పాల్గొన్నారు.  

ఈ సమావేశాన్ని ఉద్దేశించి మంత్రి మాట్లాడుతూ.. 

గడిచిన పన్నెండేళ్లలో వ్యవసాయం, గ్రామీణాభివృద్ధి, మౌలిక సదుపాయాలు, ఆరోగ్య సంరక్షణ, విద్య, మహిళా సాధికారత, డిజిటల్ గవర్నెన్స్, ఆర్థిక విలీనం మరియు సామాజిక సంక్షేమం వంటి వివిధ రంగాలలో భారత ప్రభుత్వం సాధించిన అద్భుతమైన పురోగతిని, విజయాలను ప్రస్తావించారు. ప్రభుత్వ విధానాలు, పథకాలు లక్షలాది మంది పౌరుల జీవితాల్లో విప్లవాత్మక మార్పులను తీసుకొచ్చాయని, అభివృద్ధి చెందిన భారతదేశ నిర్మాణానికి బలమైన పునాది వేశాయని అన్నారు. 

ప్రజాస్వామ్య సమాజంలో విలేకరుల ప్రాముఖ్యతను ప్రస్తావించిన మంత్రి సత్యకుమార్.. ప్రభుత్వ పథకాలు, అభివృద్ధి కార్యక్రమాల గురించి ఖచ్చితమైన, వాస్తవిక సమాచారాన్ని ప్రజలకు చేరవేయాలని పిలుపునిచ్చారు. జిల్లా, గ్రామీణ విలేకరులు ప్రభుత్వానికి, ప్రజలకు మధ్య వారధిగా పనిచేస్తున్నారని ఆయన పేర్కొన్నారు. లబ్ధిదారుల్లో సంక్షేమ పథకాల పట్ల అవగాహన కల్పించడంలో వీరు కీలక పాత్ర పోషించగలరని వ్యాఖ్యానించారు.  

విలేకరులను ఉద్దేశించి పిఐబి విజయవాడ డైరెక్టర్ జి.సురేష్ కుమార్ మాట్లాడుతూ.. 

వివిధ విధానాలు, కార్యక్రమాలు, ప్రాజెక్టులపై ప్రామాణికమైన, వేగవంతమైన సమాచారాన్ని అందించడం ద్వారా ప్రభుత్వానికి, విలేకరులకు మధ్య పిఐబి ముఖ్యమైన అనుసంధానకర్తగా పనిచేస్తుందని తెలిపారు. ఇటువంటి కార్యక్రమాలు వివిధ ప్రతిష్టాత్మక పథకాలు, ప్రణాళికలు, అభివృద్ధి కార్యకలాపాలపై మీడియాకు విస్తృతమైన అవగాహన కల్పించడానికి తోడ్పడతాయన్నారు.   

కేంద్ర ప్రభుత్వానికి చెందిన వివిధ శాఖల సీనియర్ అధికారులు ఈ కార్యశాలలో ప్రసంగించారు. డిఫెన్స్ పబ్లిక్ రిలేషన్స్ ఆఫీసర్ సుజీత్ రెడ్డి.. రక్షణ మరియు జాతీయ భద్రతలో సమర్థవంతమైన సమాచార మార్పిడి గురించి మాట్లాడారు. కస్టమ్స్ అదనపు కమిషనర్ ఎన్. బలరామ్, ఐఆర్ఎస్, వ్యాపార సౌలభ్యం మరియు ఆర్థిక అభివృద్ధిలో కస్టమ్స్ పాత్రను వివరించారు. సౌత్ కోస్టల్ రైల్వే చీఫ్ పబ్లిక్ రిలేషన్స్ ఆఫీసర్ బాలాజీ కిరణ్, ఐఆర్‌టీఎస్, భారతీయ రైల్వే సాధించిన విజయాలు మరియు ప్రస్తుతం కొనసాగుతున్న ప్రాజెక్టులను వివరించారు.  

కేంద్ర ప్రభుత్వ పథకాలు, అభివృద్ధి కార్యక్రమాలపై విలేకరులు తమ అభిప్రాయాలను పంచుకున్న పరస్పర చర్చా కార్యక్రమంతో ఈ కార్యశాల ముగిసింది.