Amaravati : ఆర్టీఐ కార్యకర్తలకు సమాచారహక్కు పరిరక్షణ సమైక్య వేదిక విజ్ఞప్తి.. హైకోర్టు పిల్‌కు ఆధారాలు పంపాలని పిలుపు
అమరావతి : స్వచ్ఛవార్త :
ఆంధ్రప్రదేశ్ సమాచార కమిషన్ సమాచార హక్కు చట్టానికి విరుద్ధంగా తీర్పులు ఇస్తోందని ఆరోపిస్తూ, ఈ అంశంపై హైకోర్టులో ప్రజా ప్రయోజన వ్యాజ్యం (పిల్) దాఖలు చేసేందుకు సమాచారహక్కు పరిరక్షణ సమైక్య వేదిక ముందుకు వచ్చింది. ఇందుకు అవసరమైన ఆధారాలను అందించాలని రాష్ట్రంలోని ఆర్టీఐ కార్యకర్తలకు వేదిక విజ్ఞప్తి చేసింది.
సమాచార హక్కు చట్టంలోని సెక్షన్ 18(1) కింద ప్రజా సమాచార అధికారులు గడువులోగా సమాచారం ఇవ్వని సందర్భాల్లో దాఖలైన ఫిర్యాదులపై, జరిమానా లేదా శాఖాపరమైన చర్యలు కోరినప్పటికీ కమిషన్ సమాచారం ఇవ్వాలని మాత్రమే ఆదేశించిన తీర్పుల కాపీలు, సంబంధిత ఫిర్యాదు ప్రతులను పీడీఎఫ్ రూపంలో పంపించాలని కోరింది.
అలాగే సెక్షన్ 18(1) కింద దాఖలైన ఫిర్యాదులు, రెండో అప్పీళ్లపై విచారణ పూర్తై 90 రోజులు దాటినా తీర్పు ప్రతులు అందని కేసులకు సంబంధించిన నోటీసులు, అప్పీల్ పత్రాలు, ఫిర్యాదు పత్రాలను కూడా పంపించాలని సూచించింది.
ఈ ఆధారాలను సేకరించి హైకోర్టులో ప్రజా ప్రయోజన వ్యాజ్యం దాఖలు చేయనున్నట్లు సమాచారహక్కు పరిరక్షణ సమైక్య వేదిక తెలిపింది. రాష్ట్రంలోని ఆర్టీఐ కార్యకర్తలు తమ వద్ద ఉన్న సంబంధిత పత్రాలను 7306319111, 7093657365 నంబర్లకు పీడీఎఫ్ రూపంలో పంపించి సహకరించాలని విజ్ఞప్తి చేసింది.
