Buttayigudem : ప్రజారోగ్యంపై ఆకట్టుకున్న ఎల్‌.ఆర్‌. కృష్ణబాబు బృందం కళా ప్రదర్శనలు
ఏలూరు జిల్లా : బుట్టాయిగూడెం : స్వచ్ఛవార్త :
జిల్లా కలెక్టర్ ఆదేశాల మేరకు ప్రజారోగ్యంపై ఎల్‌.ఆర్‌. కృష్ణబాబు బృందం నిర్వహించిన కళాజాత ప్రదర్శనలు ప్రజలను ఆకట్టుకోవడంతో పాటు ఆలోచింపజేశాయి. మంగళవారం స్థానిక ఆర్టీసీ బస్టాండ్‌ వద్ద డీఎంహెచ్‌ఓ, జిల్లా ఎయిడ్స్‌, లెప్రసీ, క్షయ నివారణ అధికారి, ఆంధ్రప్రదేశ్ ఎయిడ్స్‌ అండ్‌ హెచ్‌ఐవీ నియంత్రణ అధికారుల సహకారంతో ఈ కార్యక్రమం నిర్వహించారు.
కృష్ణబాబు బృందం హెచ్‌ఐవీ, ఎయిడ్స్‌ నివారణ, మాదకద్రవ్యాల దుష్ప్రభావాలు, రక్తదానం, ప్రజారోగ్యం వంటి అంశాలపై కళాజాత ద్వారా ప్రజలకు అవగాహన కల్పించింది. బృందం ప్రదర్శించిన ‘టీ స్టాల్‌’, ‘కింగ్‌ లాంటి కుర్రోడు’ వంటి కళారూపాలు పలువురిని ఆకట్టుకున్నాయి.
యువత మాదకద్రవ్యాలకు, ముఖ్యంగా గంజాయి, హెరాయిన్‌ వంటి వాటికి బానిస కాకుండా బంగారు భవిష్యత్తును నిర్మించుకోవాలని కళాకారులు సందేశమిచ్చారు. రక్తదానం చేయడం ద్వారా మరో ప్రాణాన్ని కాపాడవచ్చని, ప్రతి ఒక్కరూ నిర్భయంగా రక్తదానం చేయవచ్చని వివరించారు.
హెచ్‌ఐవీపై భయపడాల్సిన అవసరం లేదని, సకాలంలో పరీక్షలు చేయించుకుని వైద్యుల సూచనల మేరకు మందులు వాడుతూ, పోషకాహారం తీసుకుంటే ఆరోగ్యకరమైన జీవితాన్ని కొనసాగించవచ్చని అవగాహన కల్పించారు. హెచ్‌ఐవీ సోకిన వ్యక్తుల పట్ల వివక్ష చూపడం చట్టరీత్యా నేరమని, 2017 చట్టం ప్రకారం జరిమానా, జైలు శిక్షకు అవకాశం ఉందని తెలిపారు.
“జాగ్రత్త జాగ్రత్త తమ్ముడు... జాగ్రత్త జాగ్రత్త అమ్మడు... హెచ్‌ఐవీ తెచ్చుకోకు – చీకటి తప్పు చేయబోకు”, “ఇంటికి దీపం ఇల్లాలు ఉండగా అపరిచితులతో పరిచయం వద్దు” వంటి పాటలు, సందేశాలతో కళాకారులు ప్రజలను చైతన్యపరిచారు.
కార్యక్రమంలో దిశా ఎన్జీవో సంస్థ పీఎం స్వాతి, ఓఆర్‌డబ్ల్యూ మంగతాయారు, పీఈ దుర్గారాణి తదితరులు పాల్గొన్నారు.
