Eluru : మంత్రి కొలుసు పార్థసారథి చేతుల మీదుగా కైకలూరు పోలీసులకు ప్రశంస పత్రాలు
ఏలూరు జిల్లా : కైకలూరు/ఏలూరు : స్వచ్ఛవార్త :
కైకలూరు సర్కిల్ పరిధిలో ఉత్తమ సేవలు అందించిన పోలీసు అధికారులు, సిబ్బందికి స్వాతంత్ర్య దినోత్సవం సందర్భంగా ప్రశంస పత్రాలు అందజేశారు. శనివారం ఏలూరులోని జిల్లా పోలీసు కార్యాలయంలో నిర్వహించిన స్వాతంత్ర్య దినోత్సవ వేడుకల్లో ఆంధ్రప్రదేశ్ గృహ నిర్మాణ శాఖ మంత్రి కొలుసు పార్థసారథి చేతుల మీదుగా కైకలూరు రూరల్ సీఐ రవికుమార్, కలిదిండి ఎస్‌ఐ పవన్‌కుమార్‌, కలిదిండి హెడ్‌ కానిస్టేబుల్‌ ఎం. శ్రీనివాస్, ముదినేపల్లి కానిస్టేబుల్‌ బి. నాగబాబులకు ప్రశంస పత్రాలు అందజేశారు.
ఈ సందర్భంగా మంత్రి కొలుసు పార్థసారథి మాట్లాడుతూ..
పోలీసు అధికారులు, సిబ్బంది విధి నిర్వహణలో మరింత అంకితభావంతో పనిచేయాలని సూచించారు. ప్రజలకు అందుబాటులో ఉంటూ వారి సమస్యలను సత్వరం పరిష్కరించేలా కృషి చేయాలని, శాంతిభద్రతల పరిరక్షణలో అప్రమత్తంగా వ్యవహరించాలని సూచించారు. ఉత్తమ సేవలు అందిస్తున్న పోలీసు అధికారులు, సిబ్బందిని అభినందిస్తూ ఇదే స్ఫూర్తితో మరింత సమర్థవంతంగా పనిచేయాలని ఆకాంక్షించారు.
కైకలూరు సర్కిల్ పరిధిలో విధి నిర్వహణలో ఉత్తమ ప్రతిభ కనబరిచి, ప్రజలకు మెరుగైన సేవలు అందించినందుకు సీఐ, ఎస్‌ఐ, హెడ్‌ కానిస్టేబుల్‌, కానిస్టేబుల్‌లకు ప్రశంస పత్రాలు అందించారు.
కార్యక్రమంలో ఏలూరు జిల్లా కలెక్టర్ వెట్రి సెల్వి, జిల్లా ఎస్పీ కే. ప్రతాప్‌ శివకిషోర్‌, ఇతర పోలీసు ఉన్నతాధికారులు, సిబ్బంది పాల్గొన్నారు.
