Eluru/Elbrus : సాహసమే శ్వాసగా... మౌంట్ ఎల్బ్రస్‌పై రెపరెపలాడిన 100 మీటర్ల త్రివర్ణం!
- ఏలూరు రూరల్ ఎస్సై వి. వెంకటేశ్వరరావు సాధించిన అరుదైన ఘనత
- పోలీసు అమరవీరులకు విజయం అంకితం
ఏలూరు జిల్లా : ఏలూరు : స్వచ్ఛవార్త :
దేశభక్తిని, కఠోర సాధనను మేళవిస్తూ ఏలూరు రూరల్ పోలీస్ స్టేషన్ సబ్‌ ఇన్స్పెక్టర్ (SI) వి. వెంకటేశ్వరరావు అంతర్జాతీయ స్థాయిలో అరుదైన ఘనత సాధించారు. రష్యాలోని కాకసస్ పర్వత శ్రేణుల్లో అత్యంత ఎత్తైన, ప్రతికూల వాతావరణానికి పేరుగాంచిన 'మౌంట్ ఎల్బ్రస్' (5,642 మీటర్లు) శిఖరాన్ని ఆయన విజయవంతంగా అధిరోహించారు.
స్వాతంత్ర్య దినోత్సవ సందర్భంగా మైనస్ డిగ్రీల తీవ్ర చలిని, దట్టమైన మంచును అధిగమించి శిఖరాగ్రానికి చేరుకున్న వెంకటేశ్వరరావు... అక్కడ 100 మీటర్ల పొడవైన భారీ భారత త్రివర్ణ పతాకాన్ని ఎగురవేశారు. అనంతరం జాతీయ గీతాన్ని ఆలపించి తన దేశభక్తిని చాటుకున్నారు.
అమరవీరులకు నివాళి :
తన పర్వతారోహణ విజయాన్ని విధి నిర్వహణలో ప్రాణాలర్పించిన పోలీసు అమరవీరులకు అంకితం ఇస్తున్నట్లు ఎస్సై తెలిపారు. పోలీసు శాఖలో కఠినమైన విధులు నిర్వహిస్తూనే, మరోవైపు క్రీడా స్ఫూర్తితో పర్వతారోహణను సాధన చేస్తూ ఆయన ఈ రికార్డు నెలకొల్పడం విశేషం.
ఎవరెస్ట్ దిశగా ఈ వెంకన్న అడుగులు :
ఇప్పటికే పలు పర్వతాలను జయించిన ఆయన, తన తదుపరి లక్ష్యంగా ప్రపంచంలోనే అత్యంత ఎత్తైన 'మౌంట్ ఎవరెస్ట్' అధిరోహణకు సిద్ధమవుతున్నారు. విధి నిర్వహణలో నిబద్ధత, సాహస క్రీడల్లో ప్రతిభ చూపుతున్న వెంకటేశ్వరరావును జిల్లా పోలీసు ఉన్నతాధికారులు, సహచరులు మరియు స్థానికులు అభినందించారు. ఆయన విజయం యువతకు ఎంతో స్ఫూర్తిదాయకమని కొనియాడారు.
