Kalidindi : 22-ఏ జాబితా నుంచి భూములు తొలగించాలి.. రైతులకు సీఎం చంద్రబాబు భరోసా
కలిదిండి : స్వచ్ఛవార్త :
ఏలూరు జిల్లా కైకలూరు నియోజకవర్గంలోని కలిదిండిలో సోమవారం నిర్వహించిన ‘మీ భూమి–మీ హక్కు’ కార్యక్రమంలో ముఖ్యమంత్రి నారా చంద్రబాబు నాయుడు పాల్గొన్నారు. ఈ సందర్భంగా స్థానిక తహసీల్దార్ కార్యాలయంలో రైతులు, మాజీ సైనికులతో సమావేశమై వారి భూ, రెవెన్యూ సమస్యలను అడిగి తెలుసుకున్నారు.
22-ఏ జాబితాపై రైతుల ఆవేదన :
తమ భూములను 22-ఏ నిషేధిత జాబితాలో చేర్చడంతో ఎదురవుతున్న ఇబ్బందులను రైతులు, బాధితులు ముఖ్యమంత్రి దృష్టికి తీసుకువచ్చారు. భూములు తమ ఆధీనంలో ఉన్నప్పటికీ రిజిస్ట్రేషన్లు జరగకపోవడం, ఇతర అవసరాలకు వినియోగించుకోలేకపోతున్న పరిస్థితులను వివరించారు.
సమస్యలను సానుకూలంగా విన్న సీఎం :
రైతులు, బాధితులు వివరించిన సమస్యలను ముఖ్యమంత్రి చంద్రబాబు సానుకూలంగా విన్నారు. ఆయా భూములను 22-ఏ జాబితా నుంచి తొలగించేలా చర్యలు తీసుకోవాలని జిల్లా కలెక్టర్‌ను ఆదేశించారు. డీనోటిఫికేషన్ ప్రక్రియను వేగవంతం చేసేందుకు ఆర్డీఓకు డీనోటిఫికేషన్ అధికారాలు కల్పించాలని సూచించారు.
2,745 ఎకరాలకు పరిష్కారం :
ఉనికిలి, కలిదిండి, వైవాక గ్రామాలకు చెందిన 830 కుటుంబాల పరిధిలోని 2,745 ఎకరాల భూములు రైతుల పేర్లపై రిజిస్ట్రేషన్ అయ్యేలా చర్యలు చేపట్టారు. ఈ సందర్భంగా ముఖ్యమంత్రి చంద్రబాబు రైతులకు, లబ్ధిదారులకు 1-బి అడంగల్ ప్రతులను అందజేశారు.
తమ భూ సమస్యలకు పరిష్కారం చూపడంతో రైతులు ముఖ్యమంత్రి చంద్రబాబుకు కృతజ్ఞతలు తెలిపారు. తమ భూములపై హక్కులు స్పష్టమయ్యేలా చర్యలు తీసుకోవడం పట్ల హర్షం వ్యక్తం చేశారు.
