Mandavalli : పలికేగూడెం ఓఎన్జీసీ ప్లాంట్‌లో భద్రతా తనిఖీలు : రక్షణ విధానాలను పరిశీలించిన ఏలూరు డిఎస్పీ
ఏలూరు జిల్లా : మండవల్లి : స్వచ్ఛవార్త :
మండవల్లి మండలంలోని పలికేగూడెం గ్రామంలో ఉన్న ఓఎన్జీసీ (ONGC) వద్ద గురువారం సేఫ్టీ, సెక్యూరిటీ మరియు భద్రతా విధానాలను పోలీసు శాఖ మరియు ఓఎన్జీసీ అధికారులు సంయుక్తంగా పరిశీలించారు. ఏలూరు డి.ఎస్.పి డి. శ్రావణ్ కుమార్ నేతృత్వంలో ఈ పరిశీలన కార్యక్రమం జరిగింది.
ఈ సందర్భంగా డిఎస్పీ శ్రావణ్ కుమార్ ప్లాంట్ ఆవరణలోని భద్రతా ఏర్పాట్లు, సెక్యూరిటీ సిబ్బంది నిఘా, సీసీ కెమెరాల పనితీరు మరియు అత్యవసర సమయాల్లో అనుసరించాల్సిన రక్షణ చర్యలను క్షుణ్ణంగా తనిఖీ చేశారు. ప్లాంట్‌లో పనిచేసే సిబ్బంది రక్షణతో పాటు చుట్టుపక్కల గ్రామాల ప్రజల భద్రతను దృష్టిలో ఉంచుకుని ఓఎన్జీసీ ప్రతిపాదిత సేఫ్టీ ప్రోటోకాల్స్ కచ్చితంగా అమలు చేయాలని స్పష్టం చేశారు.
ఏదైనా అత్యవసర పరిస్థితి లేదా ప్రమాదం సంభవించినప్పుడు తక్షణమే స్పందించేందుకు వీలుగా అగ్నిమాపక వ్యవస్థలు, అత్యవసర రక్షణ చర్యలు నిరంతరం సిద్ధంగా ఉంచాలని అధికారులకు సూచనలు చేశారు.
కార్యక్రమంలో కైకలూరు రూరల్ సి.ఐ వి. రవికుమార్, మండవల్లి ఎస్.ఐ సిహెచ్. రామచంద్ర రావులతో పాటు ఓఎన్జీసీ సీనియర్ ఇంజనీర్ వి. శివప్రసాద్, సీనియర్ ఫోర్‌మెన్ (మెకానికల్) సిహెచ్. కుమార స్వామి మరియు ఇతర భద్రతా సిబ్బంది పాల్గొన్నారు.
