Mudinepalli : అనారోగ్యంతో వివాహిత మృతి.. అంత్యక్రియలకు అంబుల వైష్ణవి ఆర్థిక సాయం
ఏలూరు జిల్లా : ముదినేపల్లి : స్వచ్ఛవార్త :
ఊపిరితిత్తుల సమస్యలతో అనారోగ్యానికి గురై ఓ వివాహిత మృతి చెందిన ఘటన మండలంలోని అన్నవరం గ్రామంలో చోటు చేసుకుంది. గ్రామానికి చెందిన పోలగాని శ్రీలక్ష్మి (28) కొంతకాలంగా అనారోగ్యంతో బాధపడుతూ బుధవారం సాయంత్రం మృతి చెందినట్లు తెలిసింది.
శ్రీలక్ష్మికి ఒక కుమారుడు ఉన్నాడు. కుటుంబ కలహాల కారణంగా భర్తకు దూరంగా ఉంటూ కుమారుడితో కలిసి జీవిస్తున్నట్లు సమాచారం. నిరుపేద కుటుంబానికి చెందిన ఆమె కూలి పనులు చేసుకుంటూ జీవనం సాగించేది. అనారోగ్యంతో మృతి చెందడంతో కుటుంబ సభ్యులు తీవ్ర విషాదంలో మునిగిపోయారు.
అంత్యక్రియలకు రూ.5 వేల సాయం :
శ్రీలక్ష్మి మృతదేహానికి అంత్యక్రియలు నిర్వహించేందుకు కుటుంబ సభ్యులు ఆర్థిక ఇబ్బందులు ఎదుర్కొంటున్న విషయం తెలుసుకున్న అమరావతి బ్రాండ్ అంబాసిడర్ అంబుల వైష్ణవి స్పందించారు. తన తండ్రి డాక్టర్ మనోజ్ ద్వారా రూ.5,000 ఆర్థిక సాయం అందించారు. నిరుపేద కుటుంబానికి అండగా నిలిచి అంత్యక్రియలకు సహకరించిన అంబుల వైష్ణవి, డాక్టర్ మనోజ్‌ను స్థానికులు అభినందించారు.
