Nandigama : గంట వ్యవధిలోనే పోయిన బ్యాగ్ రికవరీ.. బాధితులకు అప్పగింత.. నందిగామ పోలీసుల వేగవంతమైన స్పందన

నందిగామ (ఎన్టీఆర్ జిల్లా): స్వచ్ఛవార్త :

ప్రయాణంలో పోయిన విలువైన డాక్యుమెంట్లు, బంగారం, నగదు ఉన్న బ్యాగును నందిగామ సర్కిల్ పోలీసులు కేవలం గంట వ్యవధిలోనే రికవరీ చేసి బాధితుడికి సురక్షితంగా అప్పగించారు. గురువారం బాధితుడు ఠాణాలో ఫిర్యాదు చేయగా.. సాంకేతిక పరిజ్ఞానం, సీసీ కెమెరాల ఆధారంగా పోలీసులు వేగంగా స్పందించిన తీరుపై బాధితుడు హర్షం వ్యక్తం చేశారు.

సంఘటన వివరాలు :

హైదరాబాద్ నుంచి ట్రావెల్స్ కారులో ఒక ప్రయాణికుడు నందిగామ చేరుకున్నాడు. అక్కడ కారు దిగిన తర్వాత తన వద్ద ఉండాల్సిన బ్యాగ్ కనిపించకపోవడాన్ని గమనించాడు. ఆ బ్యాగులో ముఖ్యమైన పత్రాలతో పాటు విలువైన బంగారం, నగదు ఉండటంతో ఆందోళనకు గురైన బాధితుడు వెంటనే నందిగామ సర్కిల్ ఇన్‌స్పెక్టర్ శ్రీనును కలసి ఫిర్యాదు చేశాడు.

సీసీ కెమెరాల ఆధారంగా గాలింపు :

బాధితుడి ఫిర్యాదుపై ఎన్టీఆర్ కమిషనరేట్ ఆదేశాల మేరకు, ఏసీపీ శ్రీనివాసరావు పర్యవేక్షణలో సీఐ శ్రీను ఆధ్వర్యంలో పోలీసులు వెంటనే రంగంలోకి దిగారు. కారు ప్రయాణించిన మార్గాల్లోని సీసీ కెమెరాల ఫుటేజ్‌ను క్షుణ్ణంగా పరిశీలించి వాహనం వెళ్లిన దిశను గుర్తించారు.

గంటలోనే ఛేదించిన పోలీసులు :

కానిస్టేబుల్ సంతోష్ చురుగ్గా వ్యవహరించి సీసీ ఫుటేజ్ ఆధారంగా గంట వ్యవధిలోనే బ్యాగ్‌ను సురక్షితంగా రికవరీ చేశారు. అనంతరం బాధితుడిని పోలీస్ స్టేషన్‌కు పిలిపించి సమాచారాన్ని సరిచూసుకుని బ్యాగ్‌ను అందజేశారు. సమయస్ఫూర్తితో వ్యవహరించి తమ సొత్తును తిరిగి అందించిన నందిగామ పోలీసులకు బాధితుడు కృతజ్ఞతలు తెలిపారు.

శబాష్ నందిగామ పోలీస్ :

ప్రయాణంలో పోయిన విలువైన బ్యాగ్‌ను కేవలం గంట వ్యవధిలోనే రికవరీ చేసి అప్పగించిన నందిగామ పోలీసుల సమయస్ఫూర్తిపై బాధితుడితో పాటు, నందిగామ సర్కిల్ ప్రజలు మరియు ఉన్నతాధికారుల నుండి ప్రశంసల అందుతున్నాయి.

.