Polavaram : నేర పరిశోధనలో శాస్త్రీయ పద్ధతులపై పోలీసు సిబ్బందికి శిక్షణ
ఏలూరు జిల్లా :పోలవరం : స్వచ్ఛవార్త :
కార్మిల్‌పురం సెయింట్ ఫ్రాన్సిస్ పాఠశాల మైదానంలో శుక్రవారం పోలవరం సర్కిల్ పోలీసు సిబ్బందికి ప్రత్యేక పరేడ్‌తో పాటు నేర పరిశోధనపై శిక్షణ కార్యక్రమం నిర్వహించారు. జిల్లా ఎస్పీ కె. ప్రతాప్ శివకిషోర్ ఆదేశాల మేరకు, పోలవరం డీఎస్పీ కె. జయకృష్ణ పర్యవేక్షణలో పోలవరం ఎస్సై పి. అప్పారావు, కొయ్యలగూడెం ఎస్సై వి. చంద్రశేఖర్ ఆధ్వర్యంలో ఈ కార్యక్రమం జరిగింది.
నేరస్థల పరిశీలనపై శిక్షణ :
నేరస్థలాన్ని శాస్త్రీయ పద్ధతిలో పరిశీలించడం, సంఘటనా స్థలంలో ఫొటోలు తీయడం, భౌతిక సాక్ష్యాలను సేకరించి భద్రపరచడం, రఫ్ స్కెచ్ రూపొందించడం, సాక్షుల వాంగ్మూలాలను నమోదు చేయడం తదితర అంశాలపై పోలీసులకు శిక్షణ ఇచ్చారు. కోర్టులో సాక్ష్యాలు నిలిచే విధంగా ప్రతి ఆధారాన్ని పకడ్బందీగా సేకరించి భద్రపరచాలని సూచించారు.
క్రమశిక్షణతో విధులు నిర్వహించాలి :
పోలీసులు సమయపాలన, క్రమశిక్షణ పాటిస్తూ ప్రజలకు మరింత చేరువగా పనిచేయాలని డీఎస్పీ కె. జయకృష్ణ సూచించారు. మారుతున్న పరిస్థితులకు అనుగుణంగా సాంకేతిక పరిజ్ఞానాన్ని అందిపుచ్చుకుని నేరాల దర్యాప్తు నాణ్యతను మరింత పెంచుకోవాలని తెలిపారు.
కార్యక్రమంలో ఎస్సైలు పి. అప్పారావు, వి. చంద్రశేఖర్‌తో పాటు పోలవరం సర్కిల్ పోలీసు సిబ్బంది పాల్గొన్నారు.
