Vijayawada : మైనారిటీల అభివృద్ధికి రూ.8.76 కోట్లు..
- ఎంపీ కేశినేని చిన్ని ప్రశ్నతో పార్లమెంట్‌లో స్పందించిన కేంద్రం..
- లబ్బీపేటలో చిత్రపటానికి పాలాభిషేకం..
ఎన్టీఆర్ జిల్లా : విజయవాడ : స్వచ్ఛవార్త :
మైనారిటీల అభివృద్ధి, సంక్షేమానికి సంబంధించిన నిధులపై పార్లమెంట్‌లో ప్రశ్నించిన విజయవాడ ఎంపీ కేశినేని చిన్ని ప్రశ్నకు కేంద్ర మైనారిటీ వ్యవహారాల శాఖ స్పందించింది. ప్రధానమంత్రి జన్ వికాస్ కార్యక్రమం (పీఎంజేవీకే) కింద మైనారిటీల అభివృద్ధి కోసం రూ.8.76 కోట్లు విడుదల చేసినట్లు కేంద్రం వెల్లడించింది.
ఈ నేపథ్యంలో ఎన్టీఆర్ జిల్లా మైనారిటీ సెల్ అధ్యక్షుడు షేక్ కరీముల్లా ఆధ్వర్యంలో జిల్లా వ్యాప్తంగా ఏడు నియోజకవర్గాల్లో ఎంపీ కేశినేని చిన్ని చిత్రపటానికి పాలాభిషేకాలు నిర్వహించారు. విజయవాడ తూర్పు నియోజకవర్గంలోని లబ్బీపేటలో నిర్వహించిన కార్యక్రమంలో మైనారిటీ నాయకులు, కార్యకర్తలు పాల్గొన్నారు.
ఈ సందర్భంగా కరీముల్లా మాట్లాడుతూ : విద్య, మహిళా సాధికారత, క్రీడలు, మౌలిక వసతులు, ఆర్థిక అభివృద్ధికి పీఎంజేవీకే నిధులు దోహదపడతాయని తెలిపారు. మైనారిటీల సమస్యలను పార్లమెంట్‌లో ప్రస్తావించిన ఎంపీ కేశినేని చిన్నికి కృతజ్ఞతలు తెలిపారు.
