Amaravati : 31 నుంచి 4వ ర్యాంకుకు.. ఏలూరు జిల్లా దూకుడు.. సీఎం చంద్రబాబు ప్రశంసలు
అమరావతి : స్వచ్ఛవార్త :
రాష్ట్రంలోని జిల్లాల ప్రగతి, పనితీరుపై శుక్రవారం నిర్వహించిన సమీక్షలో ఏలూరు జిల్లా విశేష ప్రతిభ కనబరిచి ముఖ్యమంత్రి నారా చంద్రబాబు నాయుడు నుంచి ప్రత్యేక ప్రశంసలు అందుకుంది. గతంలో 31వ స్థానంలో ఉన్న జిల్లా ఏకంగా 27 స్థానాలు మెరుగుపడి 4వ ర్యాంకుకు చేరుకోవడంపై సీఎం హర్షం వ్యక్తం చేశారు.
జిల్లాల ర్యాంకింగ్‌లకు సంబంధించిన వివరాలను అధికారులు సమీక్షా సమావేశంలో ముఖ్యమంత్రికి వివరించారు. ఏలూరు జిల్లా సాధించిన పురోగతిపై స్పందించిన చంద్రబాబు.. “అన్ని జిల్లాల కంటే ఏలూరు మెరుగైన పనితీరు (బెస్ట్ పర్ఫార్మెన్స్) కనబరిచింది” అని ప్రశంసించారు.
ఈ విజయానికి కృషి చేసిన జిల్లా ఇన్‌చార్జి మంత్రి, కలెక్టర్, స్థానిక ఎమ్మెల్యేలు, ఇతర ప్రజాప్రతినిధులు, అధికారులు, సిబ్బందిని సీఎం అభినందించారు. సమష్టి కృషితోనే ఈ పురోగతి సాధ్యమైందని పేర్కొన్నారు.
