Machilipatnam : రేపు కృష్ణా జిల్లా కలెక్టరేట్‌లో ఇండస్ట్రియల్ బిజినెస్ మీట్
- పారిశ్రామిక, వ్యాపార రంగ సమస్యల పరిష్కారానికి ప్రత్యేక వేదిక
- సువర్ణ అవకాశాన్ని సద్వినియోగం చేసుకోవాలని జిల్లా కలెక్టర్ డీకే బాలాజి పిలుపు
కృష్ణా జిల్లా : మచిలీపట్నం : స్వచ్ఛవార్త :
కృష్ణా జిల్లాలో పారిశ్రామిక, వ్యాపార రంగ అభివృద్ధికి మరింత ప్రోత్సాహం అందించేందుకు జిల్లా యంత్రాంగం ఆధ్వర్యంలో గురువారం (సెప్టెంబరు 17) జిల్లా కలెక్టరేట్‌లో ఇండస్ట్రియల్ బిజినెస్ మీట్ నిర్వహించనున్నట్లు జిల్లా కలెక్టర్ డీకే బాలాజి ఒక ప్రకటనలో తెలిపారు.
ఇటీవల కృష్ణా విశ్వవిద్యాలయంలో నిర్వహించిన ‘వన్ ఫ్యామిలీ–వన్ ఎంటర్‌ప్రెన్యూర్’ వర్క్‌షాప్‌కు లభించిన విశేష స్పందనకు కొనసాగింపుగా ఈ సమావేశాన్ని నిర్వహిస్తున్నట్లు తెలిపిన కలెక్టర్, కొత్తగా వ్యాపారం లేదా పరిశ్రమ ప్రారంభించాలనుకునే ఔత్సాహికులు, ఇప్పటికే వ్యాపారాలు నిర్వహిస్తున్న పారిశ్రామికవేత్తలు తమకు ఎదురవుతున్న సమస్యలు, అవసరాలను నేరుగా అధికారుల దృష్టికి తీసుకువచ్చేందుకు ఈ సమావేశం అవకాశం కల్పిస్తుందని తెలిపారు.
వ్యాపారాలు ప్రారంభించేందుకు అవసరమైన ప్రభుత్వ అనుమతులు, వివిధ శాఖల నుంచి అందాల్సిన సహకారం, ఇతర సమస్యలపై సంబంధిత అధికారులతో నేరుగా చర్చించే అవకాశం ఉంటుందని కలెక్టర్ తెలిపారు. జిల్లా యంత్రాంగానికి చెందిన వివిధ శాఖల అధికారులు సమావేశంలో అందుబాటులో ఉంటారని, సమస్యలను వీలైనంత త్వరగా పరిష్కరించేందుకు చర్యలు తీసుకుంటామని స్పష్టం చేశారు.
కృష్ణా జిల్లాలో వ్యాపార అవకాశాలను అన్వేషిస్తున్న ఇతర ప్రాంతాల పారిశ్రామికవేత్తలు, పెట్టుబడిదారులు కూడా సమావేశంలో పాల్గొని జిల్లాలో అందుబాటులో ఉన్న అవకాశాలు, ప్రభుత్వ సహకారం, అనుమతులు తదితర అంశాలపై అధికారులతో చర్చించవచ్చని కలెక్టర్ తెలిపారు.
గురువారం కలెక్టరేట్‌లో జరిగే ఇండస్ట్రియల్ బిజినెస్ మీట్‌కు పారిశ్రామికవేత్తలు, వ్యాపార ఔత్సాహికులు, పెట్టుబడిదారులు హాజరై ఈ అవకాశాన్ని సద్వినియోగం చేసుకోవాలని జిల్లా కలెక్టర్ కోరారు. సమావేశానికి సంబంధించిన సమాచారం కోసం 9989092288 నంబర్‌ను సంప్రదించాలని సూచించారు.
