Prattipadu : డ్రంక్‌ అండ్‌ డ్రైవ్‌ కేసుల్లో కోర్టు కొరడా.. ఐదుగురికి జైలు, రూ.లక్ష జరిమానా
రోడ్డు ప్రమాదాల నివారణకు పోలీసులు చేపట్టిన డ్రంక్‌ అండ్‌ డ్రైవ్‌ తనిఖీల్లో పట్టుబడిన వారికి కోర్టు శిక్షలు విధించింది. ఎస్పీ ఆదేశాల మేరకు ప్రత్తిపాడు సర్కిల్ పరిధిలో పోలీసులు నిర్వహించిన ప్రత్యేక తనిఖీల్లో నమోదైన కేసులపై మంగళవారం ప్రత్తిపాడు జేఎఫ్‌సీఎం కోర్టులో విచారణ జరిగింది.
ప్రత్తిపాడు, ఏలేశ్వరం, అన్నవరం పోలీస్‌ స్టేషన్ల పరిధిలో నమోదైన మొత్తం 15 డ్రంక్‌ అండ్‌ డ్రైవ్‌ కేసుల్లో రూ.1 లక్ష జరిమానా విధించగా, ఐదుగురికి జైలు శిక్ష పడింది.
ప్రత్తిపాడు పోలీస్‌ స్టేషన్‌ పరిధిలో నమోదైన మూడు కేసుల్లో ఇద్దరికి రూ.10 వేల చొప్పున జరిమానా, మరొకరికి మూడు రోజుల జైలు శిక్ష విధించారు. ఏలేశ్వరం పోలీస్‌ స్టేషన్‌ పరిధిలో నమోదైన నాలుగు కేసుల్లో ఇద్దరికి రూ.10 వేల చొప్పున జరిమానా, మరో ఇద్దరికి రెండేసి రోజుల జైలు శిక్ష విధించారు.
అన్నవరం పోలీస్‌ స్టేషన్‌ పరిధిలో నమోదైన ఎనిమిది కేసుల్లో ఆరుగురికి రూ.10 వేల చొప్పున జరిమానా విధించగా, మరో ఇద్దరికి వరుసగా రెండు, మూడు రోజుల జైలు శిక్ష విధించారు.
మద్యం సేవించి వాహనాలు నడపడం వల్ల ప్రమాదాల ముప్పు పెరుగుతుందని పోలీసులు పేర్కొన్నారు. డ్రంక్‌ అండ్‌ డ్రైవ్‌తో పాటు బహిరంగ ప్రదేశాల్లో మద్యం సేవించే వారిపైనా చట్టప్రకారం కఠిన చర్యలు తప్పవని ప్రత్తిపాడు సీఐ సూర్య అప్పారావు హెచ్చరించారు.
