Eluru : జిల్లాలో రేపటి నుంచి పింఛన్ల పంపిణీ : జిల్లా కలెక్టర్ వెట్రి సెల్వి
ఏలూరు జిల్లా : ఏలూరు కలెక్టరేట్ (స్వచ్ఛవార్త) :
జిల్లాలో నవంబర్ నెలకు సంబంధించిన సామాజిక పింఛన్ల పంపిణీ ఈనెల 30వ తేదీ ఉదయం 7 గంటల నుంచి ప్రారంభమవుతుందని జిల్లా కలెక్టర్ కె. వెట్రిసెల్వి గురువారం ఓ ప్రకటనలో తెలిపారు. జిల్లాలో మొత్తం 2,52,397 మంది పింఛనుదారులకు రూ.111.04 కోట్లను పంపిణీ చేయనున్నట్లు వెల్లడించారు.
అనివార్య కారణాల వల్ల అక్టోబర్ 30న పింఛను తీసుకోలేని లబ్ధిదారులకు నవంబర్ 5వ తేదీ వరకు పంపిణీ చేస్తామని కలెక్టర్ పేర్కొన్నారు. పింఛన్ల పంపిణీ కోసం జిల్లావ్యాప్తంగా 4,916 మంది గ్రామ, వార్డు సచివాలయ సిబ్బందితో పాటు ఇతర ప్రభుత్వ ఉద్యోగులను నియమించినట్లు తెలిపారు.
నవంబర్ నెల పింఛన్ల పంపిణీపై మండల పరిషత్ అభివృద్ధి అధికారులు, మున్సిపల్ కమిషనర్లతో టెలికాన్ఫరెన్స్ నిర్వహించి ఆదేశాలు జారీ చేసినట్లు కలెక్టర్ చెప్పారు. అక్టోబర్ 30న పింఛన్ల పంపిణీకి నగదు కొరత లేకుండా చూడాలని జిల్లా లీడ్ బ్యాంక్ మేనేజర్‌ను ఆదేశించినట్లు తెలిపారు.
పింఛనుదారులకు ముందస్తుగా సమాచారం అందించి, పింఛను తీసుకునే సమయంలో సంబంధిత సచివాలయ సిబ్బందికి తమ ఇళ్ల వద్ద అందుబాటులో ఉండేలా చూడాలని జెడ్పీ సీఈవో ఎం. కృష్ణమోహన్, డీఆర్డీఏ ప్రాజెక్టు డైరెక్టర్ టి. విజయలక్ష్మి, జిల్లా స్వర్ణ గ్రామ, సచివాలయ నోడల్ అధికారి వెంకటనాయుడుతో పాటు సంబంధిత అధికారులను కలెక్టర్ ఆదేశించారు.
