Kaikaluru : కైకలూరు జడ్పీటీసీ అభ్యర్థిగా బలే ఏసు రాజు నామినేషన్
- కామినేని శ్రీనివాస్‌కు కృతజ్ఞతలు తెలిపిన ఏసు రాజు.. మండల అభివృద్ధికి కృషి చేస్తానని వెల్లడి...
ఏలూరు జిల్లా : కైకలూరు (స్వచ్ఛవార్త) :
స్థానిక సంస్థల ఎన్నికల్లో కైకలూరు మండల జడ్పీటీసీ అభ్యర్థిగా బలే ఏసు రాజు గురువారం నామినేషన్ దాఖలు చేశారు. పార్టీ ముఖ్య నాయకులు, స్థానిక ప్రజాప్రతినిధులు, కూటమి నాయకులు, కార్యకర్తలు, అభిమానులతో కలిసి జడ్పీ కార్యాలయానికి చేరుకుని రిటర్నింగ్ అధికారికి నామినేషన్ పత్రాలు సమర్పించారు.
ఈ సందర్భంగా ఏసు రాజు మాట్లాడుతూ... తనపై నమ్మకంతో జడ్పీటీసీ అభ్యర్థిగా పోటీ చేసే అవకాశం కల్పించిన కైకలూరు ఎమ్మెల్యే కామినేని శ్రీనివాస్‌కు, కూటమి నాయకులకు ప్రత్యేక ధన్యవాదాలు తెలిపారు. ఎమ్మెల్యే తనపై ఉంచిన నమ్మకాన్ని ఎన్నికల్లో విజయం సాధించడం ద్వారా నిలబెట్టుకుంటానని పేర్కొన్నారు. కైకలూరు మండల పరిధిలోని ప్రతి గ్రామ అభివృద్ధికి, ప్రజల సంక్షేమానికి నిరంతరం కృషి చేస్తానని హామీ ఇచ్చారు. మండలంలోని ఎంపీటీసీ అభ్యర్థులందరినీ భారీ మెజార్టీతో గెలిపించుకునేందుకు శ్రమిస్తానని తెలిపారు. కూటమి నాయకులు, కార్యకర్తల సమన్వయంతో ఎన్నికల్లో ముందుకు సాగుతానన్నారు.
కార్యక్రమంలో కైకలూరు ఎక్స్ ఎమ్మెల్సీ కమ్మిలి విఠల్, కైకలూరు మండల ముఖ్య నాయకులు, ఎంపీటీసీ అభ్యర్థులు, కొల్లేరు లంక గ్రామాల పెద్దలు, కూటమి నాయకులు, కార్యకర్తలు పెద్ద సంఖ్యలో పాల్గొని బలే ఏసు రాజుకు శుభాకాంక్షలు తెలిపారు.
